O proxecto, localizado na illa de Sálvora, tivo como obxecto dar a coñecer a vinculación da illa, pertencente ao Parque Nacional Marítimo-Terrestre das illas Atlánticas de Galicia, co ciclo artúrico europeo.
A illa de Sálvora atesoura, segundo o poeta Ramón Cabanillas, a mítica espada Excalibur. Chantada na pedra de xeito máxico, por obra de Merlín, agarda a ser reclamada por un novo rei do pobo celta atlántico como no seu día fixera Arturo de Bretaña. Ramón Cabanillas (1876-1959). No poemario Na noite estrelecida reelaborou os mitos do ciclo artúrico celta ao servizo do galeguismo de principios do século XX.
